୭ ଦିନ ମଧ୍ୟରେ ଜାତୀୟ ରାଜପଥ ସମ୍ପ୍ରସାରଣ ସମସ୍ୟା ସମାଧାନ ସମନ୍ବୟ ବୈଠକ ଅନୁଷ୍ଠିତ କରିବା ପାଇଁ ପରାମର୍ଶ 

ଜାତୀୟ ରାଜପଥ ସମ୍ପର୍କୀତ ସମୀକ୍ଷା ବୈଠକ

 

 ୭ ଦିନ ମଧ୍ୟରେ ଜାତୀୟ ରାଜପଥ ସମ୍ପ୍ରସାରଣ ସମସ୍ୟା ସମାଧାନ ସମନ୍ବୟ ବୈଠକ ଅନୁଷ୍ଠିତ କରିବା ପାଇଁ ପରାମର୍ଶ 

 

ଜେ ବି ଏନ, ରିପୋର୍ଟ, ସୁଶୀଲ କୁମାର ଆଇଚ, ଅନୁଗୋଳ , ତା.୦୨.୦୪, ୨୦୨୧ : – ଅନୁଗୋଳ ଜିଲ୍ଲା ମଧ୍ୟରେ ଯାଇଥିବା ୫୫ ନଂ ଏବଂ ୧୪୯ ନଂ ଜାତୀୟ ରାଜପଥର ସମ୍ପ୍ରସାରଣ ସମ୍ପର୍କିତ ସମୀକ୍ଷା ବୈଠକ ଆଜି ପୂର୍ବାହ୍ନରେ ସ୍ଥାନୀୟ ସର୍କିଟ ହାଉସ୍ ସମ୍ମିଳନୀ କକ୍ଷ ଠାରେ ଅନୁଷ୍ଠିତ ହୋଇଯାଇଛି । ଓଡ଼ିଶା ବିଧାନସଭାର ଉପ – ବାଚପତି ତଥା ଅନୁଗୋଳ ବିଧାୟକ ଶ୍ରୀ ରଜନୀକାନ୍ତ ସିଂଙ୍କ ମାର୍ଗଦର୍ଶନରେ ଅନୁଷ୍ଠିତ ବୈଠକରେ ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ଵାଇଁ ଅଧ୍ୟକ୍ଷତା କରି ବୈଠକର ଉଦ୍ଦେଶ୍ୟ ଓ ଆଭିମୁଖ୍ୟ ସମ୍ପର୍କରେ ଆଲୋକପାତ କରିବା ସହିତ ପରଷ୍ପର ମଧ୍ୟରେ ସମନ୍ବୟ ରଖି ସମ୍ପ୍ରସାରଣ କାର୍ଯ୍ୟକୁ ତ୍ବରାନ୍ବିତ କଲେ ଜିଲ୍ଲାବାସୀ ଏହାର ସୁଫଳ ଶିଘ୍ର ପାଇପାରିବେ ବୋଲି ଜିଲ୍ଲାପାଳ ପ୍ରକାଶ କରିଛନ୍ତି । ବଅଁରପାଳ ଠାରୁ ବହ୍ଲର ଏବଂ ବହ୍ଲରରୁ ଗୋଡିବନ୍ଧ ପର୍ଯ୍ୟନ୍ତ ୪ ଲେନ୍‌ ବିଶିଷ୍ଟ ଜାତୀୟ ରାଜପଥ ସମ୍ପ୍ରସାରଣ , ଅନୁଗୋଳରୁ ସମ୍ବଲପୁର ପର୍ଯ୍ୟନ୍ତ ଜାତୀୟ ରାଜପଥ ସମ୍ପ୍ରସାରଣ ଏବଂ ଅନୁଗୋଳ ବାଇପାସ୍ ନିର୍ମାଣଧିନ ରାସ୍ତା କାର୍ଯ୍ୟରେ ଉପୁଜୁଥୁବା ସମସ୍ୟାକୁ ତୁରନ୍ତ ସମାଧାନ କରି ସମ୍ପ୍ରସାରଣ କାର୍ଯ୍ୟକୁ ତ୍ବରାନ୍ବିତ କରିବା ପାଇଁ ଉପବାଚସ୍ପତି ପରାମର୍ଶ ଦେଇଛନ୍ତି । ଜାତୀୟ ରାଜପଥ ପ୍ରାଧିକରଣ ସଂସ୍ଥା ଏବଂ ଜିଲ୍ଲା ପ୍ରଶାସନର ବିଭାଗୀୟ କର୍ତ୍ତୁପକ୍ଷ ମଧ୍ୟରେ ଥିବା ସମନ୍ୱୟକୁ ଅଧିକ ବଳବତ୍ତର କରିବା ପାଇଁ ୫୫ନଂ ଜାତୀୟ ରାଜପଥ ସମସ୍ୟା ସମାଧାନ ସମନ୍ଵୟ ବୈଠକ ୭ ଦିନ ମଧ୍ୟରେ ଅତିରିକ୍ତ ଜିଲ୍ଲାପାଳ ( ସାଧାରଣ ) ଶ୍ରୀ ତପନ କୁମାର ଶତପଥି ଏବଂ ୧୪୯ନଂ ଜାତୀୟ ରାଜପଥ ସମନ୍ବୟ ବୈଠକ ଅତିରିକ୍ତ ଜିଲ୍ଲାପାଳ ( ରାଜସ୍ବ ) ଶ୍ରୀ ସନ୍ତୋଷ କୁମାର ପ୍ରଧାନଂକ ଅଧ୍ୟକ୍ଷତାରେ ଅନୁଷ୍ଠିତ କରିବା ପାଇଁ ସେ ପରାମର୍ଶ ଦେଇଛନ୍ତି । ଏହି ୨ ବୈଠକରେ ସମ୍ପ୍ରସାରଣ ସମ୍ପର୍କିତ ସମସ୍ୟାର ଆଶୁ ସମାଧାନ ବାହାର କରାଯାଇ ରାଜପଥ ନିର୍ମାଣ କାର୍ଯ୍ୟକୁ ତ୍ବରାନ୍ବିତ କରିବାକୁ ଉପ – ବାଚସ୍ପତି ପରାମର୍ଶ ଦେଇଛନ୍ତି । ବଅଁରପାଳରୁ ତାଳଚେର ମଧ୍ୟରେ ଜାତୀୟ ରାଜପଥ ସମ୍ପ୍ରସାରଣ ଓ ଓଭରବ୍ରିଜ୍‌ ନିର୍ମାଣ କରାଯିବ । ତାଳଚେରରୁ ବଅଁରପାଳ ଅଭିମୂଖେ ଆସୁଥିବା ଯାନବାହାନ ଓଭରବ୍ରିଜ ତଳ ରାସ୍ତାରେ ଯାତାୟାତ କରିବେ ଏବଂ କଟକରୁ ତାଳଚେର ଆସୁଥିବା ଯାନବାହାନ ଓଭରବ୍ରିଜ ଉପର ଦେଇ ତାଳଚେରରେ ପହଂଚିବେ । ଯାହାଫଳରେ ଯାତାୟାତ ସମୟରେ ବର୍ତ୍ତମାନ ଦେଖାଯାଉଥିବା ସମସ୍ୟାର ସମାଧାନ ହୋଇପାରିବ ବୋଲି ସେ ଆଶା ପ୍ରକାଶ କରିଛନ୍ତି ।

 

ଅଦ୍ୟାବଧି ଅନୁଗୋଳ ବାଇପାସ୍ ଜମି ଅଧଗ୍ରହଣ ବାବଦରେ ପାଖାପାଖି ୩ କୋଟି ଟଙ୍କା ପ୍ରଦାନ କରାଯାଇଥିବା ବେଳେ ନୂଆହତା , ଶରଧାପୁର , କାଙ୍ଗୁଲା , ଖମାର ଓ ଚନ୍ଦ୍ରବାହାଳ ଗ୍ରାମର ଜମି ପ୍ରଦାନକାରୀଙ୍କ ଅନୁକମ୍ପା ରାଶି ଯଥାଶିଘ୍ର ପ୍ରଦାନ କରାଯିବା ପାଇଁ ଆବଶ୍ୟକ ତ୍ବରିତ ପଦକ୍ଷେପ ନିଆଯାଉଅଛି ବୋଲି ବିଭାଗୀୟ ଅଧିକାରିଣୀ ମନିଷା ଗୁପ୍ତା ବୈଠକକୁ ଅବଗତ କରିଥିଲେ । ସମ୍ପ୍ରସାରଣ ସମୟରେ ଛାତ୍ର ଛାତ୍ରୀମାନଂକ ସୁରକ୍ଷାକୁ ପ୍ରାଧାନ୍ୟ ଦେବା ପାଇଁ ଉପ – ବାଚସ୍ପତି ପରାମର୍ଶ ଦେଇଛନ୍ତି । ସମ୍ପ୍ରସାରଣରେ ପ୍ରଭାବିତ ହେଉଥିବା ଅନୁଗୋଳ ନିକଟସ୍ଥ ଖମାର ବିଦ୍ୟାଳୟ , ବଅଁରପାଳ ନିକଟସ୍ଥ ସନ୍ତରି ବିଦ୍ୟାଳୟ , ବଇଁଣ୍ଡା ନିକଟସ୍ଥ ଲୁହାମୁଣ୍ଡା ବିଦ୍ୟାଳୟ କିମ୍ବା ଜିଲ୍ଲାର ଅନ୍ୟ ବିଦ୍ୟାଳୟ ଓ ଅଂଗନୱାଡି କେନ୍ଦ୍ରଗୁଡିକୁ ଉପଯୁକ୍ତ ସ୍ଥାନକୁ ସ୍ଥାନାନ୍ତର କରିବା ପାଇଁ ସେ ପରାମର୍ଶ ଦେଇଛନ୍ତି । ଅନୁଗୋଳ ସଦର ମହକୁମା ଦେଇ ଯାଇଥିବା ଜାତୀୟ ରାଜପଥର ହସ୍ତାନ୍ତର ପ୍ରକ୍ରିୟା ଆରମ୍ଭ ହୋଇସାରିଛି ଏବଂ ୩୫ କୋଟି ଟଙ୍କା ବ୍ୟୟରେ ଏହି ରାସ୍ତାର ସମ୍ପ୍ରସାରଣ ଓ ଆଧୁନିକକରଣ କରାଯିବ । ସେହିପରି ୧୪୯ ନଂ ଜାତୀୟ ରାଜପଥର ବଅଁରପାଳ ଠାରୁ ଗୋଡିବନ୍ଧ ପର୍ଯ୍ୟନ୍ତ ୧୭.୭୫ କି.ମି ରାସ୍ତାକୁ ୫୨୦ କୋଟି ଟଙ୍କା ବ୍ୟୟରେ ୪ ଲେନ୍‌ ବିଶିଷ୍ଟ ରାସ୍ତାରେ ପରିଣତ କରାଯିବ । ଏହାର ଜମି ଅଧଗ୍ରହଣ କାର୍ଯ୍ୟ ଆରମ୍ଭ ହୋଇସାରିଛି ବୋଲି ଏନ୍ ଏଚ୍ ଏ ଆଇ କର୍ତ୍ତୃପକ୍ଷ ପ୍ରକାଶ କରିଛନ୍ତି । ଏହି କାର୍ଯ୍ୟକୁ ତ୍ବରାନ୍ବିତ କରିବା ପାଇଁ ତାଳଚେର ବିଧାୟକ ଶ୍ରୀ ବ୍ରଜ କିଶୋର ପ୍ରଧାନ ପରାମର୍ଶ ଦେଇଛନ୍ତି । ଏହି ବୈଠକରେ ଅନ୍ୟମାନଂକ ମଧ୍ୟରେ ଛେଣ୍ଡିପଦା ବିଧାୟକ ଶ୍ରୀ ସୁଶାନ୍ତ କୁମାର ବେହେରା , ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଶ୍ରୀ ଦିଲ୍ଲିପ କୁମାର ସାହୁ , ସମସ୍ତ ଉପଜିଲ୍ଲାପାଳ , ଜାତୀୟ ରାଜପଥ ପ୍ରାଧିକରଣ କର୍ତ୍ତୁପକ୍ଷର ସ୍ଥାନୀୟ ଟିମ୍ ହେଡ୍ ଶ୍ରୀ ଅନୁପ ପାଣିଗ୍ରାହୀ , ପ୍ରକଳ୍ପ ନିର୍ଦ୍ଦେଶକ ଶ୍ରୀ ଏ ଶ୍ରୀନିବାସ ରାଓ ଏବଂ ଜିଲ୍ଲା ସ୍ତରୀୟ ବିଭାଗୀୟ ଅଧିକାରୀମାନେ ଯୋଗ ଦେଇଥିଲେ ।

Recent Post

Live Cricket Update