ନୂଆଦିଲ୍ଲୀ : ୨୦୧୫ ଥିଲା ଆପ୍ ପାଇଁ ବେଶ୍ ସହଜ, ୨୦୨୦ ହୋଇଥିଲା ତାଠାରୁ ଆହୁରି ସହଜ, ହେଲେ ୨୦୨୫ ସେତେଟା ସହଜ ନାହିଁ । କାରଣ ଜାତୀୟ ରାଜଧାନୀ ଦିଲ୍ଲୀରେ ୧୦ ବର୍ଷ ଧରି କ୍ଷମତାରେ ଥିବା ଅରବିନ୍ଦ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ପାଇଁ ସରକାର ବିରୋଧୀ ହାୱା ବଡ଼ ଅଡୁଆ ହୋଇଛି । ଅବକାରୀ ଦୁର୍ନୀତିର ଦମ୍ ନଥିଲେ ମଧ୍ୟ ଆପ୍ ସରକାରକୁ ଦିଲ୍ଲୀର ଆପଦା କହି, କେଜ୍ରିୱାଲଙ୍କ ପାର୍ଟି ବିରୋଧରେ ରଣହୁଂକାରର ସୁରୁଆତ୍ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ସିସ୍ ମହଲ ପ୍ରସଙ୍ଗ ମଧ୍ୟ କେଜ୍ରିୱାଲ ଓ ତାଙ୍କ ପାର୍ଟିକୁ ଅକଳରେ ପକାଇଥିଲା ।…ନବଆଦିଲ୍ଲୀ ଆସନରେ ଅରବିନ୍ଦ କେଜ୍ରିୱାଲଙ୍କୁ ଟକ୍କର ଦେଇଛନ୍ତି ଦୁଇ ପୂର୍ବତନ ମୁଖ୍ୟମନ୍ତ୍ରୀଙ୍କ ପୁଅ । କଂଗ୍ରେସ, ପୂର୍ବତନ ମୁଖ୍ୟମନ୍ତ୍ରୀ ଶୀଲା ଦୀକ୍ଷିତଙ୍କ ପୁଅ ସନ୍ଦୀପ ଦୀକ୍ଷୀତଙ୍କୁ କେଜ୍ରିୱାଲଙ୍କ ବିରୋଧରେ ନୂଆଦିଲ୍ଲୀ ଆସନରେ ପ୍ରାର୍ଥୀ କରାଇଛି । ସେହିଭଳି ପୂର୍ବତନ ମୁଖ୍ୟମନ୍ତ୍ରୀ ସାହିବ ସିଂହ ବର୍ମାଙ୍କ ପୁଅ ପରଭେଶ ବର୍ମାଙ୍କୁ ଛିଡ଼ା କରାଇଛି ବିଜେପି । ୨୦୧୪ ପୂର୍ବରୁ ଇଷ୍ଟ ଦିଲ୍ଲୀ ଆସନରୁ ୨ ଥର ସାଂସଦ ଥିଲେ ସନ୍ଦୀପ ଦୀକ୍ଷିତ । ସେହିଭଳି ପଶ୍ଚିମ ଦିଲ୍ଲୀରୁ ମଧ୍ୟ ୨ ଥର ସାଂସଦ ରହିଥିଲେ ପରଭେଶ ବର୍ମା । ଗତ ଲୋକସଭା ନିର୍ବାଚନରେ ବିଜେପି ତାଙ୍କୁ ଟିକେଟ ଦେଇ ନଥିଲା । ସନ୍ଦୀପ ତାଙ୍କ ମାଆ ଶୀଲା ଦୀକ୍ଷିତଙ୍କ ଲିଗାସିକୁ ପାଥେୟ କରି ମୈଦାନକୁ ଓହ୍ଲାଇ ଥିବା ବେଳେ ପରଭେଶ ମଧ୍ୟ ତାଙ୍କ ବାପା ସାହିବ୍ ସିଂହ ବର୍ମାଙ୍କ ଲିଗାସିକୁ ଭରସା କରିଛନ୍ତି ।ବର୍ତ୍ତମାନ ସୁଦ୍ଧା ଯେଉଁ ପ୍ରାର୍ଥୀ ନୂଆଦିଲ୍ଲୀ ବିଧାନସଭା ଆସନ ଜିତିଛନ୍ତି, ସେ ହୋଇଛନ୍ତି ଦିଲ୍ଲୀର ମୁଖ୍ୟମନ୍ତ୍ରୀ । ନୂଆଦିଲ୍ଲୀ ଆସନ ଜିତି, ଶେଷଥର ପାଇଁ ୨୦୦୮ରୁ ୨୦୧୩ ଯାଏଁ ମୁଖ୍ୟମନ୍ତ୍ରୀ ଥିଲେ କଂଗ୍ରେସର ଶୀଲା ଦୀକ୍ଷିତ । କିନ୍ତୁ ୨୦୧୩ ପ୍ରଥମ ପଦାର୍ପଣରେ ତାଙ୍କୁ ହରାଇ ଦେଲେ ଅରବିନ୍ଦ କେଜ୍ରିୱାଲ । କଂଗ୍ରେସ କିମ୍ବା ବିଜେପି- କେହି ଏଥର କେଜ୍ରିୱାଲଙ୍କୁ ୱାକ୍ ଓଭର୍ ଦେବା ମୁଡ୍ରେ ନାହାନ୍ତି । ଦିଲ୍ଲୀ ନିର୍ବାଚନ, ବିଜେପି ପାଇଁ ସମ୍ମାନର ପ୍ରଶ୍ନ ହୋଇଥିବା ବେଳେ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ପାଇଁ ଅସ୍ତିତ୍ବର ପ୍ରଶ୍ନ । କଂଗ୍ରେସ ପାଇଁ ଏହା ଫୁଟ୍ ପ୍ରିଣ୍ଟର ପ୍ରଶ୍ନ । ଦିନ ଥିଲା ଦିଲ୍ଲୀ ଥିଲା କଂଗ୍ରେସର ଗଡ଼ । ଶୀଲା ଦୀକ୍ଷିତଙ୍କ ଜମାନାର ଝଲକ୍, ଏବେ ବି ଦିଲ୍ଲୀର କୋଣ ଅନୁକୋଣରେ ରହିଛି । ହେଲେ ୨୦୧୩ରେ ପ୍ରଥମ ପଦାର୍ପଣରେ କେଜ୍ରିୱାଲ୍, ଶୀଲା ଦୀକ୍ଷିତଙ୍କୁ ହରାଇବା ପରେ ଜାତୀୟ ରାଜଧାନୀରେ କଂଗ୍ରେସର ସତ୍ତା ଶୂନ ହୋଇ ଯାଇଛି କହିଲେ ଭୁଲ ହେବନି ।୨୦୧୪ରେ କେନ୍ଦ୍ରରେ ନରେନ୍ଦ୍ର ମୋଦିଙ୍କ ନେତୃତ୍ବାଧୀନ ବିଜେପି କ୍ଷମତାକୁ ଆସିବା ପରେ ୨୦୧୫ରେ ପ୍ରଥମେ ସାମ୍ନା କରିଥିଲେ ଦିଲ୍ଲୀ ନିର୍ବାଚନ । ସେତେବେଳେ ବିଜେପିର ହାୱା ପ୍ରବଳ ଥିଲା । ୭୦ ଆସନରୁ ସେତେବେଳେ ଆମ୍ ଆଦମୀ ପାର୍ଟିକୁ ୬୭ ଆସନ ମିଳିଥିବା ବେଳେ ବିଜେପିକୁ ମିଳିଥିଲା ମାତ୍ର ୩ । ସେହିଭଳି ୨୦୨୦ରେ ୬୨ଟି ଆସନ ମିଳିଥିଲା ଆପ୍କୁ, ବିଜେପି ପାଇଥିଲା ୮ଟି । ଗତ ନିର୍ବାଚନରେ ଦିଲ୍ଲୀରେ ଆମ୍ ଆଦମୀ ପାର୍ଟିକୁ ୫୩.୬ ପ୍ରତିଶତ ଭୋଟ ମିଳିଥିବା ବେଳେ ବିଜେପିକୁ ମିଳିଥିଲା ୩୮.୫ ପ୍ରତିଶତ । କଂଗ୍ରେସର ଭୋଟ୍ ଶେୟାର୍ ମାତ୍ର ୪.୨୬ ପ୍ରତିଶତ ଥିଲା । ୨୦୧୫ ଓ ୨୦୨୦ରେ ନାକ ତଳର ନିଶକୁ ନିଜର କରିପାରି ନଥିବା ବିଜେପି, ଏଥର ଆପ୍ ବିରୋଧରେ ଫୁଲ୍ ଫୋର୍ସ ଦେଇ ଲଢ଼େଇ କରିଛି । ସେପଟେ ପୂର୍ବ ୨ଟି ନିର୍ବାଚନ ଅପେକ୍ଷା ଏଥର କଂଗ୍ରେସ ଆପ୍ ବିରୋଧରେ ଅଧିକ ଆଗ୍ରେସିଭ୍ ହୋଇଛି । ଦଳିତ ଓ ମୁସଲିମ୍ ଭୋଟ୍ ଯଦି ବିଭାଜନ ହୋଇଥିବ ଏବଂ କଂଗ୍ରେସର ଭୋଟ ଶେୟାର ଯଦି ୬ରୁ ୭ ପ୍ରତିଶତ ମଧ୍ୟରେ ରହେ, ତେବା ଆପ୍ ପାଇଁ ସମସ୍ୟା ସୃଷ୍ଟି ହେବାର ସମ୍ଭାବନା ଅଧିକ ରହୁଛି ।
