ଜିଲ୍ଲାସ୍ତରୀୟ ସଡ଼କ ସୁରକ୍ଷା କମିଟି ବୈଠକ ଅନୁଷ୍ଠିତ
ଢେଙ୍କାନାଳ : 27/2- ଆଜି ଅପାରହ୍ନରେ ଜିଲ୍ଲାପାଳ କାର୍ଯ୍ୟାଳୟସ୍ଥିତ ସଦଭାବନା ସଭା ଗୃହରେ ଜିଲ୍ଲାପାଳ ଶ୍ରୀ ସୋମେଶ କୁମାର ଉପାଧ୍ୟାୟଙ୍କ ଅଧ୍ୟକ୍ଷତାରେ ଜିଲ୍ଲା ସ୍ତରୀୟ ସଡ଼କ ସୁରକ୍ଷା କମିଟି ବୈଠକ ଅନୁଷ୍ଠିତ ହେଇଯାଇଛି l ବୈଠକରେ ଯୋଗଦେଇ ଜିଲ୍ଲାପାଳ କହିଛନ୍ତି ଯେ, ସଡ଼କ ସୁରକ୍ଷା ସମ୍ପର୍କିତ ସଚେତନତା ପରିବାର ବର୍ଗ ପ୍ରଥମେ ଗୋଟେ ପିଲାକୁ ଦେବା ଆବଶ୍ୟକ l ତେଣୁ ଏହା ଆମର ପ୍ରଥମ କର୍ତ୍ତବ୍ୟ ଆମେ ପ୍ରଥମେ ସଚେତନ ହୋଇ ଆମ ପିଲାମାନଙ୍କୁ ସଚେତନ କରାଇବା l ବୈଠକ ପ୍ରାରମ୍ଭରେ ଅଧିକ୍ଷଣ ଯନ୍ତ୍ରୀ ଶ୍ରୀ ଜୟନ୍ତ କୁମାର ନାୟକ ଗତମାସରେ ହେଇଥିବା ବୈଠକର ନିଷ୍ପତ୍ତିର କାର୍ଯ୍ୟକାରିତା ସମ୍ପର୍କରେ ଆଲୋଚନା କରିଥିଲେ l ପ୍ରଥମତଃ କଲେଜ ବାଇପାସ ରୁ କୋରିଆନ ବାଇପାସ ପର୍ଯ୍ୟନ୍ତ ରାଜପଥରେ 8 ଟି ସ୍ଥାନରେ 8 ଟି ହାଇମାଷ୍ଟ ଲାଇଟ ଲଗେଇବାକୁ ସ୍ଥିର ହେଇଥିଲା l ଯାହାଫଳରେ ଏହି ରାସ୍ତାରେ ସଡ଼କ ଦୁର୍ଘଟଣାକୁ ଏଡା ଯାଇପାରିବ l ଜାତୀୟ ରାଜପଥ ପ୍ରାଧିକରଣର କର୍ତ୍ତୃପକ୍ଷ ନିଜ ଉତ୍ତରେ କହିଥିଲେ ଯେ ବର୍ତ୍ତମାନ ସୁଦ୍ଧା ସେମାନେ 4 ଟି ଜାଗାରେ ଏହି ଲାଇଟ ଲଗେଇସାରିଲେଣି ଓ ଖୁବ ଶୀଘ୍ର ଆଉ 4 ଟି ଲାଇଟ ଲଗା ଯିବ l ସେଇଭଳି କଟକ ରୁ ଢେଙ୍କାନାଳ ମଧ୍ୟରେ ଯେଉଁସବୁ ବେଆଇନ କଟିଙ୍ଗମାନ ରହିଥିଲା ସେସବୁକୁ ପ୍ରାଧିକରଣର କର୍ତ୍ତୃପକ୍ଷ ମାଟି ପକାଇ ବନ୍ଦ କରିଦେଇଛନ୍ତି ବୋଲି କହିଥିଲେ l ଏହା ସହିତ ଜାତୀୟ ରାଜପଥ 55 ର ମୁଖ୍ୟ ନିର୍ମାଣ କାର୍ଯ୍ୟ ସବୁ ଏପ୍ରିଲ 15 ସୁଦ୍ଧା ସରିଯିବ ବୋଲି ପ୍ରାଧିକରଣର କର୍ତ୍ତୃପକ୍ଷ ଦୃଢୋକ୍ତି ପ୍ରକାଶ କରିଛନ୍ତି l ଜିଲ୍ଲାପାଳ ବୁଲାଣିରାସ୍ତାରେ ଉପଯୁକ୍ତ ସାଇନ ଚି଼ହ୍ନମାନ ଦେବାକୁ ରାଜପଥ ପ୍ରାଧିକରଣକୁ କହିଥିଲେ କାରଣ ଏହି ସବୁ ସ୍ଥାନମାନଙ୍କରେ ଅଧିକରୁ ଅଧିକ ଦୁର୍ଘଟଣା ଘଟିଥାଏ l ବୈଠକରେ ଜିଲ୍ଲା ଆରକ୍ଷୀ ଅଧିକ୍ଷକ ଶ୍ରୀ ଅଭିନଵ ସୋନକର ଯୋଗଦେଇ ସଡ଼କ ସୁରକ୍ଷାର ସଚେତନତା କରାଇବା ଯେତିକି ପ୍ରଶାସନରା ଦାୟିତ୍ୱ ସେତିକି ପରିବାରରା ଦାୟିତ୍ୱ ମଧ୍ୟ ବୋଲି ମତ ପ୍ରକାଶ କରିଥିଲେ l ଏଥିସହିତ ଜିଲ୍ଲା ଦେଇ ଯାଇଥିବା ରାଜପଥରେ ବର୍ତ୍ତମାନ ପୋଲିସର ପେଟ୍ରୋଲିଙ୍ଗ ବହୁତ ବଢ଼ାଯାଇଛି ବୋଲି କହିଥିଲେ l ଜିଲ୍ଲାରେ 2025 ଜାନୁଆରୀ ରେ ମୋଟ 38 ଟି ସଡ଼କ ଦୁର୍ଘଟଣା ଘଟିଥିବା ବେଳେ 19ଜଣ ମୃତ୍ୟୁବରଣ କରିଥିବା ବେଳେ 33 ଜଣ ଆହତ ହେଇଛନ୍ତି l ଏହି ସଂଖ୍ୟା ପୂର୍ବ ବର୍ଷ ଜାନୁଆରୀ ମାସ ତୁଳନାରେ 9.52 ପ୍ରତିଶତ କମ ଅଟେ l ଜିଲ୍ଲାରେ ଜାନୁଆରୀ ମାସରେ ସଦର ଥାନା ଅଂଚଳରେ ସର୍ବାଧିକ 7 ଟି ସଡ଼କ ଦୁର୍ଘଟଣା ଘଟିଥିବା ବେଳେ 4 ଜଣ ମୃତ୍ୟୁବରଣ କରିଛନ୍ତି l ତେବେ ଜିଲ୍ଲାରେ ରୋଡ଼ ରୋମିଓ ଙ୍କ ପ୍ରାଦୂଭାବକୁ କମ କରିବା ପାଇଁ ଅଧିକରୁ ଅଧିକ ଚେକିଂ କରିବା ସହିତ ବିକଟାଳ ଶବ୍ଦ କରୁଥିବା ସାଇଲେନ୍ସର ପାଇପକୁ ଜବତ କରାଯାଇ ଜୋରିମାନା କରାଯିବ ବୋଲି ବୈଠକରେ ନିଷ୍ପତ୍ତି ହେଇଛି l ଏହି ବୈଠକରେ ଜିଲ୍ଲା ସଡ଼କ ସୁରକ୍ଷା କମିଟି ସଦସ୍ୟ ଓ ସମ୍ପୃକ୍ତ ବିଭଗୀୟ ଅଧିକାରୀ ମାନେ ଉପସ୍ଥିତ ରହିଥିଲେ l
