ଦିନକୁ ଦିନ ସମସ୍ୟାରେ ଛନ୍ଦି ହେଉଛି ତାଳଚେର ଉପଖଣ୍ଡକମୁଛି ଭୂତଳ ଜଳସ୍ତର, ବଢ଼ୁଛି ପାନୀୟ ଜଳସମସ୍ୟା
ତାଳଚେର, ୧୪/୦୪ କିଛି ବର୍ଷ ହେବ ଭୂତଳ ଜଳସ୍ତର କମୁଥିବା ବେଳେ ପାନୀୟଜଳ ସମସ୍ୟା ଏହି ଅଂଚଳରେ ବୃଦ୍ଧି ପାଇବାର ଦେଖାଯାଉଛି । ଏନେଇ ବ୍ଲକର ଲୋକମାନେ ମଧ୍ୟରେ ଦିନକୁ ଦିନ ହତାଶ ଭାବ ସୃଷ୍ଟି ହେଉଛି । ଯେପରିକି, ୪ରୁ ୫ଥର ନଳକୂପ ମାରିଲେ ଗୋଟେ ବାଲ୍ଟି ଟିଏ ପାଣି ହୁଏ । କିନ୍ତୁ ଏବେ ମାରିମାରି ଥମିକଗଲେ ମଧ୍ୟ ପାଣି ବାଲଟିଏ ହେବା କଷ୍ଟକର ହୋଉଛି । ତେଣୁ ଲୋକମାନେ ପାନୀୟଜଳ ଯେତେ ସହଜରେ ପାଇ ପାରୁଥିଲେ ତାହା ଏବେ ଆଉ ସମ୍ଭବ ହେଉ ନାହିଁ । ଭୂତଳ ଜଳସ୍ତର କମିବା ଏହାର ମୁଖ୍ୟ କାରଣ ବୋଲି ଲୋକାମାନେ କହୁଛନ୍ତି । ପାନୀୟ ଜଳ ବିଭାଗ ଓ ପଂଚାୟତିରାଜ ବିଭାଗ ଦ୍ୱାରା ନଳକୂପ ଖନନ, ପାନୀୟଜଳ ଯୋଗାଣ କରାଯାଉଥିଲେ ମଧ୍ୟ ତାହା ସଠିକ୍ ରୂପାୟନ ହୋଇପାରୁ ନାହିଁ । ଭୂତଳ ଜଳସ୍ତର ବଢ଼ାଇବା ପାଇଁ ପୋଖରୀ ଖନନ, ଆଡ଼ିବନ୍ଧ ଇତ୍ୟାଦି ଦୀର୍ଘ ମିଆଦି ଯୋଜନା ମାଧ୍ୟମରେ ବର୍ଷାଜଳ ସଂଚୟ କରାଯାଇପାରନ୍ତା । କିନ୍ତୁ ବର୍ଷାଜଳ ସଂଚୟ ପରିବର୍ତେ ପୋଖରୀ ଓ ଖାଲ ଜମି ପୋତାଯାଇ ଗୃହ ନିର୍ମାଣ କରାଯାଇଥିବାର ଦେଖିବାକୁ ମିଳିଛି । ଫଳରେ ବର୍ଷାଜଳ ସଂଚୟ ହୋଇନପାରି ନିମ୍ନଗାମୀ ହୋଇ ବୋହି ଯାଉଛି । ସରକାରୀ ସ୍ତରରେ ପୋଖରୀ ଖନନ ଓ ଜଳାଶୟ ଉଦ୍ଧାର କରାଯିବାରୁ ଅନୁଦାନ ଥିଲେ ମଧ୍ୟ ତାହା ଧର୍ମକୁ ଆଖିଠାର ପରି କାର୍ଯ୍ୟ କରାଯାଇଛି । ରକ୍ଷଣାବକ୍ଷଣା ଅଭାବରୁ ଜଳାଶୟ ଗୁଡ଼ିକ ପୋତିହୋଇ ପଡ଼ୁଥିବା ବେଳେ ଜଳସ୍ତର ବଢ଼ାଇବା ପାଇଁ ବର୍ଷଜଳ ହିଁ ନିତ୍ୟାନ୍ତ ଆବଶ୍ୟକ । ଏପରି ଏହି ବର୍ଷାଜଳକୁ ଠିକ୍ ସମୟରେ ସଦୁପଯୋଗ କରାଯାଇ ପାରୁନଥିବାରୁ ଭୂତଳ ଜଳ ପୂର୍ଣ୍ଣ ହୋଇନପାରି ତଳକୁ ବୋହି ଯାଉଛି । ଆହୁରି ମଧ୍ୟ ପୂର୍ବରୁ ମଧ୍ୟ ଖରାଦିନେ ଖରା ଦିନରେ ନଦୀ ଗୁଡ଼ିକରେ ପାଣି ରହୁଥିଲା । ଲୋକମାନେ ପାନୀୟଜଳ ରୂପେ ବ୍ୟବହାର କରିବା, ଗାଧୁଆ, ପାଧୁଆ କରିବା ସହିତ ଗୋରୁଗାଈ ମାନଙ୍କୁ ଧୋଉଥିଲେ । କିନ୍ତୁ ଏବେ ନଦୀ ଗୁଡ଼ିକ ପୋତିହୋଇ ପଡ଼ିବା ସହିତ ସେଥିରେ ବିଶେଷ ପାଣି ରହୁନାହିଁ । ଆହୁରି ମଧ୍ୟ ଗୋଟିଏ ଗୁରୁତ୍ୱପୂର୍ଣ୍ଣ ବିଷୟରେ ସରକାର ପାନୀୟ ଜଳ ଯୋଗାଣ ନାମରେ ପ୍ରତ୍ୟେକ ଗ୍ରାମରେ ଯେତେ ପାଣି ନଷ୍ଟ କରୁଛନ୍ତି ତାହା ଦେଖିଲେ ଜାଣିପାରିବେ । ପାନୀୟଜଳ ପ୍ରକଳ୍ପ ନାମରେ ଭୂତଳ ଜଳକୁ ପ୍ରତ୍ୟେହ ପାଇପ ଜରିଆରେ ଲୋକଙ୍କୁ ଯୋଗାଣ କରାଯାଉଥିବା ବେଳେ ଜଳ ସଠିକ୍ ବିନିଯୋଗ କରାଯାଉ ପାରୁ ନାହିଁ । ଫଳରେ ଭୂତଳ ଜଳ କମୁଥିବା ବେଳେ ପାନୀୟଜଳ ସମସ୍ୟା ବୃଦ୍ଧି ପାଉଛି । ତେବେ ବର୍ତମାନ ଭୂତଳ ଜଳବୃଦ୍ଧି ପାଇଁ ସରକାରଙ୍କ ପକ୍ଷରୁ ଯୋଜନା କରାଯାଉଛି । ଏହି ଯୋଜନା ମୂତାବକ ବିଭିନ୍ନ ଗ୍ରାମରେ ଥିବା ପୋଖରୀ, କଲେଜ ଛାତଘର ଏବଂ ସରକାରୀ ଗୃହମାନଙ୍କ ନିକଟରେ ନଳକୂପ ଖୋଳାଯାଇ ସୁଡ଼ଙ୍ଗ କରାଯାଇଛି । ପୋଖରୀ ନିକଟରେ କରାଯାଇଥିବା ନଳକୂପ ସୁଡ଼ଙ୍ଗ ପୋଖରୀରେ ସଂଯୋଗ କରାଯାଇଛି । ପୋଖରୀ ପାଣି ବୃଦ୍ଧି ହେଲେ ସେହି ନଳକୂପ ସହିତ ସଂଯୋଗ କରାଯାଇଥିବା ସୁଡ଼ଙ୍ଗ ବାଟଦେଇ ପାଣି ଭୂତଳକୁ ପ୍ରବେଶ କରିବ । ସେହିପରି ଛତାମାନଙ୍କ ନିକଟରେ କରାଯାଇଥିବା ନଳକୂପ ଏପରି ସଂଯୋଗ ରହିଛି । ଫଳରେ ଭୂତଳଜଳ ବୃଦ୍ଧି ହେବାରେ ଆଶା କରାଯାଉଛି । ତେଣୁ ପ୍ରକୃତରେ ଏହି ଯୋଜନା ଦ୍ୱାରା ଭୂତଳକୁ ଜଳ ଯାଉଛି କି ନାହିଁ ତାର ସମୀକ୍ଷା କରାଗଲେ ଏହାର ସଫଳ ରୂପାୟନ ହୋଇପାରନ୍ତା । କିନ୍ତୁ ବର୍ତମାନ ଭୂତଳ ଜଳ କମ ଥିବାରୁ ପାନୀୟଜଳ ସମସ୍ୟା ବୃଦ୍ଧି ପାଉଛି ।
