ନାମ ଫଳକରେ ରହୁନି ଓଡ଼ିଆ ଭାଷା : ତାଳଚେର
ତାଳଚେର, ୧୪/୦୪ ଓଡ଼ିଆ ଏକ ଶାସ୍ତ୍ରୀୟଭାଷାର ମାନ୍ୟତା ପାଇଥିଲା । ଏହାର ପ୍ରଚାରପ୍ରସାର ପାଇଁ ରାଜ୍ୟ ସରକାର ଗୁରୁତ୍ୱ ଦେଲେ । ଓଡ଼ିଆରେ ନାମଫଳକ ନଲେଖିଲେ ଅର୍ଥଦଣ୍ଡ ଦୋବାକୁ ବ୍ୟବସ୍ଥା କରାଗଲା । ଏହା ସତ୍ୱେ ତାଳଚେର ଅଂଚଳରେ ବିଭିନ୍ନ ବ୍ୟବସାୟ ସଂସ୍ଥା ନିଜ ନାମଫଳକ ଓଡ଼ିଆଭାଷା ବ୍ୟବହାର କରୁନଥିବା ଦେଖାଯାଇଛି । ସୂଚନା ଅନୁଯାୟୀ ୨୦୧୪ ମସିହା ମାର୍ଚ୍ଚ ୧୧ତାରିଖରେ ଓଡ଼ିଆ ଏକ ଶାସ୍ତ୍ରୀୟଭାଷାର ମାନ୍ୟତା ପାଇବା ପରେ ଏହାର ପ୍ରଚାରପ୍ରସାର ପାଇଁ ୨୦୧୬ରେ କ୍ୟାବିନେଟ୍ ବୈଠକରେ ପ୍ରସ୍ତାବ ଗୃହୀତ ହୋଇଥିଲା । ରାଜ୍ୟ ଉନ୍ନୟନ କମିଶନର୍ ସମସ୍ତ ସରକାରୀ ବେସରକାରୀ ସଂସ୍ଥା ନିଜର ନାମଫଳକ ଓଡ଼ିଆରେ ଲେଖିବା ପାଇଁ ବାଧ୍ୟତା ମୂଳକ କରିଥିଲେ । ସମସ୍ତ ବିଦ୍ୟାଳୟ, ମହାବିଦ୍ୟାଳୟ, ବିଶ୍ୱବିଦ୍ୟାଳୟ ଶୁଦ୍ଧ ଓଡ଼ିଆ ନାମଫଳକ ଲେଖିବା ନିମନ୍ତେ ୨୦୨୨ଏପ୍ରିଲ ମାସରେ ଗଣଶିକ୍ଷା ବିଭାଗ, ଉଚ୍ଚଶିକ୍ଷା ବିଭାଗ ରାଜ୍ୟର ସମସ୍ତ ଜିଲ୍ଳାପାଳଙ୍କୁ ଚିଠି ମଧ୍ୟ କରିଥିଲେ । କୌଣସି ସଂସ୍ଥା ବା ଅନୁଷ୍ଠାନ ଓଡ଼ିଆ ଭାଷାରେ ନାମ ଫଳକ ନଲେଖିଲେ ସାଧାରଣ ଲୋକ ଅଭିଯୋଗ କରିବାପାଇଁ ‘ଓଡ଼ିଆ ନାମ ଫଳକ’ ନାମରେ ଏକ ୱେବ୍ ପୋର୍ଟାଲ ବ୍ୟବସ୍ଥା କରାଯାଇଥିଲା । ଏହାର ତଦାରଖ କରିବାପାଇଁ ଜିଲ୍ଳା ଶ୍ରମଅଧିକାରୀଙ୍କୁ ଦାୟୀତ୍ୱ ଦିଆଯାଇଥିଲା । ଓଡ଼ିଆ ନାମଫଳ ନଲେଖିଲେ ମୋଟା ଅଙ୍କର ଅର୍ଥଦଣ୍ଡ ସହ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଥିଲା । ରାଜ୍ୟ ଉନ୍ନୟନ କମିଶନରଙ୍କ ଏହି ନିର୍ଦ୍ଦେଶକୁ ତାଳଚେରରେ ଅଣଦେଖା କରାଯାଇଛି । ତାଳଚେର ସହର ଓ ଏହାର ଆଖାପାଖ ଅଂଚଳରେ ଅନେକ ସରକାରୀ ବେସରକାରୀ ସଂସ୍ଥା ନିଜ ନାମଫଳକ ଓଡ଼ିଆରେ ଲେଖି ନାହାନ୍ତି । ଶ୍ରମଅଧିକାରୀ ମଧ୍ୟ ଏଥିପାଇଁ କଡ଼ା ପଦକ୍ଷେପ ନେଉଥିବା ଅଭିଯୋଗ ହୋଇଛି । ସହରରେ ହଜାର ହଜାର ଦୋକାନ ବାଣିଜ୍ୟ ପ୍ରତିଷ୍ଠାନ ଶ୍ରମ କାର୍ଯ୍ୟାଳୟରେ ପଞ୍ଜିକୃତ ହୋଇଛନ୍ତି । ଅଳ୍ପ କୋତୋଟି ସଂସ୍ଥାକୁ ଛାଡ଼ିଦେଲେ ବହୁ ସଂସ୍ଥା ଇଂରାଜୀ ଓ ହିନ୍ଦୀ ଭାଷାରେ ନାମ ଫଳକ ଲେଖିଛନ୍ତି । ଅଂଚଳରେ ଥିବା ବିଭିନ୍ନ କେନ୍ଦ୍ରୀୟ ଅନୁଷ୍ଠାନରେ ମଧ୍ୟ ସମାନ ଅବସ୍ଥା । ତାଳଚେର ସହର ପ୍ରାୟ ୧୦ଟି ପେଟ୍ରୋଲ ପମ୍ପ ଥିବା ବେଳେ ସେଥିରୁ ଅଧିକାଂଶ ତେଲଟାଙ୍କି ଓଡ଼ିଆରେ ନାମ ଫଳକ ନାହିଁ । ହାଣ୍ଡିଧୂଆଁଛକ, ହାଟତୋଟା, ମ୍ୟୁନିସ୍ପାଳଟି ମାର୍କେଟ, ବାଇପାସ୍ ଛକ, ତାଳଚେର ଟାଉନ୍, ବସଷ୍ଟାଣ୍ଡ ପ୍ରଭୃତି ଜନଗହଳି ସ୍ତାନମାନଙ୍କରେ ନାମ ଫଳକ ଇଂରାଜୀ ଭାଷାରେ ଲେଖାଯାଇଥିବା ଦେଖିବାକୁ ମିଳିଥିଲା । ଏସମ୍ପର୍କ ତାଳଚେର ଶ୍ରମଅଧିକାରୀ ଚୌଧୁରୀ ସୁବ୍ରତ ଜେନାଙ୍କୁ ପଚାରିବାରୁ ତାଳଚେର ଅଂଚଳରେ ବ୍ୟବସାୟ ପ୍ରତିଷ୍ଠାନ ବଜାରମାନଙ୍କରେ ଓଡ଼ିଆ ନାମପଳକ ଲେଖା ଯାଇଛି ବୋଲି ସେ କହିଥିଲେ ।
